Ni 9 & 10 August, 2023 khan Mizoram State Library, Art & Culture Department, Raja Rammohan Roy Library Foundation (RRRLF) leh Mizoram Library Association (MLA) tangkawp te chuan Sawrkar Recognised NGO Library 513 te tan ni hnih (2) awh State Level Library Seminar & Training chu Chanmari YMA Hall ah buatsaih ani.
Ni 9 August ah Inaugural Programme hman niin he hunah hian Pu R Lalzirliana, Minister A&C Dept chu khuallian a ni. Inauguration Programme ah hian Pi Carol VLMS Dawngkimi, Director Art & Culture Department chuan a kaihruai a, Dr Lalremsiami, President, Mizoram Library Association in thusawi na hun neiin, Dr Lalbiaksanga Hnamte, General Secretary, Mizoram Library Association hnen atangin Library Seminar & Training report ngaihthlak a ni bawk.
He hunah hian District-wise Best Rural Library thlanna result puan leh lawmman semna hun hman nghal a ni a, Distrct tina ti tha pathum theuhte hnenah lawmman - Citation leh tangka fai buatsaih anih bakah Category hrang hrang pariat a ti tha ber te hnehah Citation pek bawk a ni.
1. Aizawl District ( Outside Aizawl City) - Muallungthu Br. YMA Library
2. Aizawl District ( Aizawl City) - Chanmari Br. YMA Library
3. Lunglei District - Bualte Br. YMA Library
4. Kolasib District - Kawnpui Chhimveng Br YMA Library
5. Champhai District - Champhai Venglai Br. YMA Library
6. Serchhip District - East Lungdar Br YMA Library
7. Mamit District - Zawlnuam Vengpui Br. YMA Library
8. Lawngtlai District - Lawngtlai Chanmari YLA Library
9. Khawzawl District - Darngawn Br YMA Library
10. Saitual District - Chawngbuaia Memorial Library, Saitual
11. Hnahthial District - Penial Br. YMA Library, Hnahthial
Library & Information Science-a Phd hmu thar mi 7 te hnehnah lawmpuina citation hlan nghal a ni bawk.
Chawhnu ah Seminar program hman chhunzawm nghal ni in Dr Jacob MS Dawngliana Librarian, CDS in ' Library Sevices in a transforming society' tih thupui hmangin paper a present a, Sawrkar recognised NGO Library 288, District hrang hrang atangin he training programme hi an rawn hmang a ni
A ni hnihna August 10, 2023 (Thursday)-ah ' Accessioning leh Classification' tih thupui hmangin training neih a ni ang a; tin, Mizoram Library Association hruaitu thlanna neih nghal a ni bawk dawn. Govt Recognised NGO Library tana State Level Library Seminar & Training hi kum khat danah hman thin a ni a. MLA-ah hian OB leh Sr Adviser te bakah executive committee member 20 an awm mek a ni.
He huna khuallian Pu R. Lalzirlaina, Minister chuan thu sawiin, "Library hi lehkhabu dah khawmna satliah mai nilo in zirna in pakhat pawimawh tak a ni" a ti a. Kan Missionary ten 'A Aw B' mi hnutchhiah hi thil ropuj tak khawvel -a tribal hnam tam takin an neih phakloh a ni a, mahni tawnga thuziak thei kan nih vang te pawh hian literary rate nei tha ber State kan nih phah reng a ni, a ti bawk.
Art & Culture Minister chuan thiamna tak tak nei tur chuan tunlai inelna khawvel ah hriatna dik hriatna zau leh rintlak kan mamawh thu a sawi. Digital age, computer khawvelah kan awm tawh a, sap hovin ' information is at our doorstep' an tih ang khan , kan kawtchhuahah kan ban phakah hian khawvel hriat tur zawng zawng ang hi chu internet kaltlangin kan chhiarin kan hmu thei vek tawh a ni ti. Chutihrual erawh chuan misinformation leh thu belhchian dawllo lakah kan in ven fimkhur a tul thu a sawi tel bawk.
Library hi public service provider kan ni tih hriatreng a pawimawh bakah mipui tana rawngbawltute kan nih hriat reng a tul thu a sawi leh bawk. Tun dinhmunah RRRLF hnuaia recognised Library 513 kan nei thei hi lawmawm a tih thu a sawi bakah Art & Culture department chuan kan Library te a changtlung zel theihnan theihtawp kan chhuah zel dawn thu a sawi bawk a ni.
